Clubes tudenses organizan actividades de Nadal

Martes, 16 de decembro de 2014.. Chegados a esta época do ano os clubes deportivos tudenses organizan distintas actividades deportivas de Nadal, torneos, festivais e exhibicións co fin de amosar o aprendido ao longo deste curso.

Así, o Club Balonmán Tui celebra o seu tradicional torneo de Nadal de balonmán, tanto hoxe como mañá mércores, dende as 16.00 ata 19.00 horas, no pavillón deportivo municipal novo, nas categorías alevín e infantil, así como benxamín e prebenxamín.

O Club Baloncesto Tui organizará o venres 19 o VI Torneo Solidario de Baloncesto, que se celebrará no vello pavillón deportivo municipal, dende as 16.30 ata as 19.30 horas, tendo como obxectivo a recollida de alimentos para a asociación Cáritas.

Na xornada do sábado, o Club Deportivo DiSom Tui realizará un festival de Kung Fu no pavillón deportivo do IES San Paio, dende as 17.00 ata as 19.30 horas.

Por último, o Club Ribex celebrará o domingo 21, o Festival de Nadal de Patinaxe, a partir das 18.00 horas, no novo pavillón deportivo municipal tudense.